Hei hei!

Onsdag var vi ute og åt med jentene ifrå fysioen. Då prøvde vi ein ny restaurant som heitte New Green Restaurant. Den såg ganske shabby ut i frå utsida, men sidan den var anbefalt både i Lonely Planet og på veggen fann vi ut at vi måtte prøve den. Vi kom akkurat når det opna og vi fekk kjensla av å komme før dei tilsette. Lokalet var heilt tomt og vi lurte på om vi skulle gå ein annan plass. Vi tok likevel sjansen og vi fekk servert heilt fantastisk god indisk mat. Der skal vi gå igjen!

Torsdag var Miriam sjuk. Då var det sjølvsagt budsjettmøte og Renate kunne gå medan Miriam måtte ligge å glo i veggen på rommet. Fredag var det endeleg eit møte som vi begge fekk delta på. Det meste føregjekk på swahili, men vi fekk likevel med oss ein del. Vi tok opp ei sak og vi fekk ansvar for å ta kontakt med fysioterapeuten og følgje det opp. Kjekt å få noko konkret å jobbe med. Ettersom det er systempraksis vi eigentleg skal ha, er det kjekt å endeleg få litt smaken på dette.

Laurdag låg vi berre å slakka ved bassengkanten heile dagen. Fantastisk med ein dag fri utan noko på programmet. Når vi kom ville vi bestille sjokolade- og bananmilkshake og frukt. Om lag 15 minutt etter at vi bestilte fekk vi beskjed om at vi berre kunne få vanilje eller jordbærmilkshake. Vi var litt skuffa men sa det var greitt. Når vaniljemilkshaken kom fekk vi også ein tallerk med frukt, inkludert banan. Kvifor kunne vi ikkje få bananmilkshake då? Arg! Seinare bestilte vi oss peparbiff til middag, noko vi hadde sett fram til heile veka. Om vi ser vekk i frå at den var litt ”lunken” kan vi vel sei at smaken var svært god.

Neste veke skal vi ha ein dag hjå fysioterapeuten på Amani. Vi har fått inntrykk av at han har ei stor rolle her på senteret og vi gler oss til å jobbe med han. Vi skal også besøke ein barneheim og ein gamleheim der vi har høyrt at songen ”eg gjekk ein tur på stien” slår godt an ettersom ”kuku” her betyr høne.

Vi er no halvvegs i praksisperioden og vi tykkjer tida har gått fort. Heimlengselen kjem likevel fram av og til, og det kan kjennast som det er ekstremt sidan vi reiste ifrå Bergen og minusgrader.